1Ti 5 | PltULB | STEP | Aza mibedy ny lahy antitra. Fa kosa, anaro toy ny ray izy. Anaro toy ny rahalahy ireo lehilahy tanora.

1 Timothy 5

1 Aza mibedy ny lahy antitra. Fa kosa, anaro toy ny ray izy. Anaro toy ny rahalahy ireo lehilahy tanora. 2 Anaro tahaka ny reny ireo vavy antitra, ary ireo vehivahy tanora toy ny anabavy ao amin’ny fahadiovana rehetra.

3 Manajà ireo mpitondratena, ireo tena mpitondratena. 4 Fa raha manan-janaka na zafikely ny mpitondratena iray, dia avelao izy ireo aloha hianatra haneho fanajana ao amin’ny tokantranony. Aoka izy ireo hamaly babena ireo ray aman-dreniny, satria ankasitrahan’Andriamanitra izany.

5 Fa ny tena mpitondratena dia navela ho irery. Mametraka ny fitokiany amin’Andriamanitra izy. Mitoetra hatrany amin’ireo fangatahana sy vavaka andro aman’alina. 6 Na izany aza, ny vehivavy izay miaina ho an’ny fahafinaretana dia maty, na dia mbola velona aza izy.

7 Torio izany zavatra izany mba tsy ananan’izy ireo tsiny. 8 Fa raha misy olona tsy manome ho an’ireo havany akaiky, indrindra ho an’ireo izay ao amin’ny ankohonany, dia nandà ny finoana izy ary ratsy lavitra noho ny tsy mpino.

9 Aoka hosoratana ho mpitondratena ny vehivavy izay tsy latsaky ny enimpolo taona, vehivavy iray izay vadin’ny lehilahy iray. 10 Tokony ho fantatra noho ireo asa tsara izy, na nikarakara ireo ankizy, na ihany koa nampiantrano ireo mpivahiny, na nanasa ny tongotr’ireo mpino, na nanamaivana ny ory, na nanolo-tena tamin’ny asa tsara rehetra.

11 Fa ho an’ireo mpitondratena mbola tanora kosa, dia aza manaiky ny hanoratra azy ireo ao anaty lisitra. Fa rehefa milavo-lefona amin’ny filan’ny nofo hanohitra an’i Kristy izy ireo, dia te-hanambady. 12 Amin’izany izy ireo dia hahazo fanamelohana satria namadika ny fanoloran-tenany voalohany. 13 Ka dia lasa zatra malaina koa izy ireo. Mandehandeha mitety trano. Tsy hoe lasa malaina fotsiny ihany izy ireo, fa lasa mpifosa sy mpila ady ihany koa. Miteny zavatra izay tsy tokony ho teneniny izy ireo.

14 Noho izany dia tiako hanambady ireo vehivavy mbola tanora, hiteraka, hikarakara tokantrano, mba tsy ahafahany manome irika ny fahavalo hiampanga anay ho nanao ratsy. 15 Fa ny sasany efa nivily sahady hanaraka an’i Satana. 16 Raha misy vehivavy mino manana mpitondratena, aoka izy hanampy azy ireo, mba tsy hanavesatra ny fiangonana, mba hahafahany manampy ireo tena mpitondratena marina.

17 Aoka ireo loholona izay manapaka tsara mba ho raisina ho mendri-boninahitra avo roa heny, indrindra ireo izay miasa miaraka amin’ny teny sy amin’ny fampianarana. 18 Fa hoy ny Soratra Masina hoe: “Tsy tokony hanisy fehiny ny vavan’ny ny omby ianao raha mbola mively voa izy.” ary koa: “Ny mpiasa dia mendrika ny karamany.”

19 Aza mandray fiampangana manohitra ny loholona iray raha tsy misy vavolombelona roa na telo. 20 Ahitsio eo anatrehan’ny rehetra ireo mpanota mba hatahotra ny ambiny hafa.

21 Mandidy anao mafy aho eo anatrehan’Andriamanitra sy eo anatrehan’i Kristy Jesosy ary ireo anjely voafidy, mba hihazonanao ireo didy ireo tsy misy fitsaratsarana ary mba tsy hanaovanao na inona na inona amin’ny fiandaniana. 22 Aza maimaika mametra-tanana amin’iza na iza. Aza miray ao amin’ny fahotan’ny olon-kafa. Tokony hitazona ny tenanao hadio ianao.

23 Tokony tsy hisotro rano intsony ianao. Fa kosa, tokony handray divay kely ianao ho an’ny vavony sy ireo aretinao mateti-pitranga. 24 Ny fahotan’ireo olona sasany dia fantatra miharihary, ary izy ireo dia mandeha alohan’ireo ao amin’ny fitsarana. Fa ny ota sasany manaraka avy aty aoriana. Toy izany ihany koa, misy asa tsara fantatra miharihary, saingy ireo sasany aza dia tsy azo afenina.